21 Le Flambeau - 03

DZAN FIN ET DZAN FOU Reprodzo Julien l'ere un garçon de desevouèt'an, et comme tseut le dzovenno de son adzo l'ayet prèi la coteuma de chortre totte le net et de se retterié i pe– tsoude s-aoure. Cetta conta nateurellamente féijet pa plèisi a se paren que l'ayan bo lèi recomandé de pa fére tar me l'ere tot comme fére euna boma pe l'éve. Julien de sa par repondzet todzor que se reterriave a mie net mouen un quar memo se l'ere pa vrèi, et bien choven quan se paren lo sentsan entré, se cagne vegnan crèyuye. Maque in tse leur restave étot euna vieille tanta, que l'ayet jame sonno et pare sentset tot cen que se passave pe le metso et choven l'ere llie a lèi fere noté que l'ere bramente pi tar de mie net. Un dzor Julien inmaleuchà lèi dit: -Te m'ayet promettu de pa dere a papa et mamma a quint'aoura dz'entro lo net et tè beurta tsapletta t'a fallu lo lèi dere t'e pa?- L'est pa vrèi, repon la tanta, dz'i mantenu la parola; cetta matin atina mamma, quan m'at demandà quant'ere entrà cetta net, mè dz'i repondu-lèi que dz'ero in tren d'apresté lo cafe et dz'i pa vu quint'aoura l'ere! Prèisa dessu lo vif Cléman l'ayet dou mèinà Françoé et Secondine que frequantavon tseut dou l'écoula; lo premie féijet la cinquema et la seconda la quatrema et dimen que la feilletta profitave bien et l'era quase todzor la premiere de l'écoula, lo garçonnet debilavan l'ere tot l'incontréro; l'ayet pa voya d'étudzé et l'ayet maque de verneque pe la teta. Quan a la fin de l' écoula Françoé l'at portà i metso son bolettin devote, lo papa pe pocca restave pa sèinà su lo cou tellamente l'ere afreu. Françoé lo avèitsen bien lèi dit: - Gninca a mè plèison pa cice vote; dze si fran conten que mè et tè n'en le memo gou. Jame conten Marcellin l'at todzor sentu dere pe son papa que faillet jame betté a perdre le bague et faillet todzor vardé euna pomma pe la sèi. Son papa lei recomandave étot de fére attenchon de jame dépensé de sou a novere, et de se rappellé que l'est bien pi facilo de dépensé le sou que de le gagné. Pare in senten cette recomandachon, que vegnan repètàye a tseque et peque, lo noutro Marcellin l'at fenet pe le betté in pratecca. Pensade que un dzor arreuve i metso blet de tsaat et avoue lo fla qeurt et quan pout prèdzé dit a son papa: - Voueu dz'i éparmà melle livre. 97