Flambeau - Le

LA VOUÉCE ET LO VESADZO DI PRINTEN Le jeu bleu et profon camme lo chiel din çalle dzente dzorné de l'iforié et euna botse rodze et prima camme euna petsouda rousa. Un dzen sourire et de dzoute que se confondon avoue l'aura... Euna vouéce douça que prèdze avoue le fleur et le s-éspri folet... T'e lo printen. Oh printen: te me semble a euna dzenta rèina, rèina de tot, rèina de la via di pra vert, de la nèi fonduya ... Oh printen, t'e camme euna dzenta madama, dze te vèyo quand la leunna l'est plèina, avoue te lon pèi blan totta vétia d'ardzen et eun grou tsaven in man. Te tappe sensa dere ren, de rouse et de semen que duron tot l'étsaaten. Oh printen, ta douceur et te tsan, ton vesadzo et ta vouéce que m'acconpagnon pe tot l'an, m'inviton a repètté: -Oh! vouè,vouè, t'e tè cher printen per mè todzor si charman ... Denise Chaissan