23 Le Flambeau - 09

Precisachon Viergenie, l'est fran euna dzenta femalla fete pe vère et bien mariàye. Maque lo destin vout que vint vito vevva. Me, camme se pout imaginé, son veuvadzo deure pa pausa perqué pacca ten apre se marie avoue lo frere de san ommo boun'ama. Pe feté l'événemen, la novere cabla invite le s-ami a participé i gran dene de noce et naturellamente l'y est pa gneun que tint lo eu indére, surtou que se trate d'un mariadzo tseca foura di norma!. In effé le s-invità prédzon maque de ço ceilla, et un tsaquin comente la tsousa a sina façon. Que volèi vo, bien choven le dzen l'an la lenva pitou londze, camme ci invità que a un certen moman, véyen pendu i meur lo cadro di premie ommo de Viergenie, demande a gran voéce pese fére senti de tseut: - Quin l'est-e ci mocheu lé? Tseut avèitson lo cadre, me gneun aouse repondre. Adon Vierginie leven la teta, totta nateurella repon in soupiren: - Ci lé l'est mon bo frere. Pouro matas, l'est mor pacca ten fé. Todzor comme adon Tavien, apre avèi fenet se s-étude supérieure a l'université l'est tornà i metso et la premiere baga que l'at fé l'est etàye çalla de torné veseté lo collèdzo yaou quaque s-an devan l'ayet sedzornà et conservave de dzen souveni. Apre avèi vesetà le salle di s-écoule, la bibliotéca, l'at volu vère étot sa vieille tsambra. La troven fremàye beuche a la pourta et apre un momanet un étudian, pitou ingrindzà, vint la lèi ivri. Noutro Tavien entre, s'avèitse alentor déicen esclame: - L'at pa tsandzà ren, todzor la mema tsambra d'adon. Déicen allena la fenetra, avèitse foura et dit:- Todzor camme adon, lo courti yaou no allavon dzouyé i ballon et no promené quan n'ayan de ten libro. Déicen ivre la credence et dedin l'y est euna feille a mèitsà patanuya que sat pa camme se comporté. L'étudian tsertse de se jeustifié in dien: - çalla l'est mina seraou. Et Tavien tot nateurel: - Vouè, vouè, todzor le meme s-escuse camme adon. 109